Skátarnir
Home Archives 2016 febrúar

Monthly Archives: febrúar 2016

Skyndihjálp er í hávegum höfð á Úlfljótsvatni. Það er ekki nóg með að allir sumarstarfsmenn á Úlfljótsvatni fái þjálfun í skyndihjálp heldur hafa nú hafa tveir af föstum starfsmönnum þar lokið „meiraprófi“ í faginu. Gestir Úlfljótsvatns eru því sannarlega í öruggum höndum.
Þátttakendur í skólabúðum í fjallgöngu. Hvað gæti svo sem gerst, en best að vera viss.

Þátttakendur í skólabúðum í fjallgöngu. Hvað gæti svo sem gerst, en best að vera viss.

Kominn með réttindi

Kominn með réttindi

Guðmundur Finnbogason framkvæmdastjóri lauk nýlega námskeiði sem heitir Vettvangshjálp í óbyggðum, eða Wilderness First Responder. Námskeiðið sem  Slysavarnafélagið Landsbjörg heldur í umboði bandarísku samtakanna Wilderness Medical Associates er 76 klukkustunda langt.  Elín Esther Magnúsdóttir, dagskrárstjóri Úlfljótsvatns, er með sömu þjálfun og lauk endurþjálfun fyrir ári síðan

„Þetta námskeið er eitt ítarlegasta skyndihjálparnámskeið sem völ er á, að minnsta kosti fyrir þá sem eru ekki sérhæft heilbrigðisstarfsfólk, og er til dæmis krafa hjá undanförum í björgunarsveitum og mörgum fyrirtækjum sem eru með ferðir í óbyggðum, þar sem meira en tveir klukkutímar eru í sérhæfða hjálp,“ segir Guðmundur Finnbogason, framkvæmdastjóri Úlfljótsvatns.

Fyrirbyggjandi hugsun ríkir á Úlfljótsvatni

Guðmundur segir að slík þekking eigi mjög vel heima á stað eins og Úlfljótsvatni. „Við erum meðvituð um að fólk getur orðið fyrir óhöppum þegar það stundar útivist og ævintýradagskrá eins og þá sem við bjóðum upp á Úlfljótsvatni. Á síðustu árum höfum við gert mikinn skurk í fyrirbyggjandi aðgerðum, eins og verklagsreglum og áhættugreiningu, en við viljum líka vera eins vel viðbúin og við getum á hinum endanum, ef eitthvað gerist.“

Í umgengni við klifurturninn gilda ákveðnar reglur til að fyrirbyggja slys.

Í umgengni við klifurturninn gilda ákveðnar reglur til að fyrirbyggja slys.

Námskeiðið veitir réttindi í samræmi við  starfsreglur sem Landlæknir gefur út. „Réttindin gilda í þrjú ár og þá á maður að sækja endurþjálfun,“ útskýrir Guðmundur. „Þetta er eitt af því sem við viljum standa framarlega í og nálgast með heildrænum hætti – að skilja mögulega áhættu í starfi okkar, fara í fyrirbyggjandi aðgerðir en vera líka eins vel undirbúin og hægt er til að takast á við hugsanleg óhöpp. Sem dæmi fær sumarstarfsfólkið okkar þjálfun sem miðast við að tryggja öryggi eins og unnt er, og allir starfsmenn okkar fara á skyndihjálparnámskeið á vorin. Og núna má segja að við Elín séum með eins konar meirapróf í skyndihjálp,“ segir Guðmundur léttur í bragði.

Rétt viðbrögð við óhöppum og slysum

Hvað er kennt á námskeiði í skyndihjálp í óbyggðum? „Námskeiðið snýst um að kenna góð viðbrögð við óhöppum, slysum og veikindum í óbyggðum þar sem getur verið langt í læknishjálp, bæði í tíma og rúmi. Áhersla er lögð á að geta metið hversu alvarlegt ástandið er, frekar en nákvæmar sjúkdómsgreiningar, og að koma í veg fyrir að sjúklingum hraki áður en þeir komast undir læknishendur, jafnvel þó það taki einhverja daga,“ segir Guðmundur og bætir við að þó þjálfunin leggi áherslu á aðstæður í óbyggðum, nýtist hún jafn vel í matsalnum í JB-skála.

„Þetta er þekking sem er alltaf gott að búa að, og ég hvet alla skáta til að læra eins mikla skyndihjálp og þeir geta. Vonandi þurfum við aldrei að nota hana, en hún getur bjargað mannslífum.“

Björgunarsveitir þjálfa á Úlfljótsvatni. Samningur um það handsalaður.

Björgunarsveitir þjálfa á Úlfljótsvatni. Samningur um það handsalaður.

Úlfljótsvatn auglýsir eftir umsóknum vegna sumarstarfa fyrir sumarið 2016.

Auglýst er eftir umsóknum í eftirfarandi störf:

Aðstoðarforstöðumaður Sumarbúða skáta. Viðkomandi þarf að vera orðinn 18 ára þegar starfið hefst. Starfið felst meðal annars í umsjón með Sumarbúðum skáta ásamt forstöðumanni, skipulagi og utanumhaldi með starfsmannamálum og ýmsum öðrum tilfallandi verkefnum ásamt öðrum stjórnendum. Unnið er virka daga og þriðju hverja helgi eftir þörfum.

Umsjónarmaður tjaldsvæðis. Viðkomandi þarf að vera orðinn 18 ára þegar starfið hefst. Starfið felst í utanumhaldi og umsjón með tjaldsvæðinu, skipulagi verslunar og mönnunar ásamt öðrum stjórnendum. Viðkomandi sér einnig um umsjón með útiflokki Úlfljótsvatns ásamt öðrum stjórnendum. Æskilegt er að hafa vinnuvélaréttindi í réttindaflokki I. Unnið er að jafnaði frá  miðvikudegi til sunnudags.

Dagskrárstarfsmenn. Viðkomandi þarf að vera orðin 18 ára þegar starfið hefst. Starfið felst í umsjón með dagskrá Úlfljótsvatns, dagskrárstarfs sumarbúðanna á meðan þær eru í gangi en annars fjölda annarra verkefna eftir því sem þau falla til. Starfsmenn geta þurft að taka að sér öll verk á Úlfljótsvatni. Unnið er fyrri eða seinni vakt virka daga og aðra hverja helgi. Frí fjórðu hverja viku.

Matráður. Æskilegt er að hafa reynslu af því að búa til mat fyrir allt að 100 manns. Viðkomandi stýrir starfi eldhússins. Æskilegt er að geta hafið störf um miðjan maí og unnið út ágústmánuð. Úlfljótsvatn tekur á móti fjölbreyttum hópum af ýmsum stærðum og gerðum. Allt frá 20 manna hópum í grill yfir í 150 manna veislur. Stærstur hluti vinnunnar snýr að sumarbúðum þar sem eldað er fyrir um 40 börn og 25 starfsmenn mánudag til föstudags og erlendum skátahópum þar sem eldað er fyrir 20-100 manns á hverjum degi. Fjölbreyttur heimilismatur er á matseðlinum. Æskilegt er að viðkomandi sé skipulagður og agaður og hafi reynslu af innkaupum og skipulagi slíkrar vinnu. Unnið er virka daga með hvíld yfir miðjan daginn. Viðkomandi gæti verið kallaður út um helgar til að sinna tilfallandi verkefnum.

Allar umsóknir skal senda í tölvupósti á ulfljotsvatn@skatar.is fyrir 29. febrúar.

Allir sem eru ráðnir þurfa að mæta eina helgi í maí til að ljúka þjálfun staðarins.