Skátarnir
Home Archives 2014 febrúar

Monthly Archives: febrúar 2014

Skemmtum okkur saman!

Það hefur sýnt sig að góður, samheldinn hópur þar sem einstaklingarnir innan hópsins þekkja hvorn annan vel og treysta hvor öðrum eykur afköst og árangur fyrirtækja. En frábærir einstaklingarnir verða ekki sjálfkrafa að frábærum hópi.

Til að efla hópa innan fyrirtækja, hrista saman nýja hópa eða þétta hópa sem unnið hafa saman áður, er nauðsynlegt að fara öðru hvoru í nýtt umhverfi og vinna saman öðruvísi verkefni sem gera aðrar kröfur en á venjulegum vinnudegi. Verkefni sem eru skemmtileg og hvetjandi, skapa samkennd og koma hópnum til að brosa og kynnast betur.

En þó að hópeflið sé góð skemmtun felur það einnig í sér mikilvægan ávinning fyrir hópinn og fyrirtækið. Til þess að ná sem bestum árangri sérsníðum við hópeflið að hverjum hópi eftir óskum og þörfum hvers og eins.

Úlfljótsvatn er einungis í um klukkustundarfjarlægð frá Reykjavík og getur þjónustað fyrirtækið þitt með allt sem þarf til að gera hópeflið skemmtilegt og spennandi.

 

Dæmi um hópefli og hvataferðir

Hópefli –  Áskorunin

Hópurinn kemur til okkar upp úr hádegi. Fjörið byrjar á upphitun þar sem allir eru saman. Að upphitun lokinni er skipt í hópa og hóparnir fara á mismunandi stöðvar þar sem unnin eru mismunandi verkefni sem reyna á samvinnu og áræðni. Dæmi um verkefni eru t.d. klifur í hæsta klifurturni landsins og kayakverkefni á vatninu.

Að hópeflinu loknu er kvöldmatur og skemmtun fram eftir kvöldi.
Hvataferð – Vatnarallý
Hér reynir á róðrarhæfileikana í hópnum. Þaulreyndir starfsmenn Úlfljótsvatns byrja daginn á að kenna keppendum réttu kanó handtökin. Þegar búið er að prufu sigla kanóunum hefst leikurinn. Hópnum er skipt í lið þar sem hvert lið á að róa út á vatn, en hver hópur þarf að koma mikilvægum gögnum í næstu vík. Gögnunum er skilað og verkefni leyst og svo róa keppendur aftur að bryggju. Keppendur verða að reyna að komast fram og til baka án þess að blotna. Oft getur það verið erfiðara en sýnist sérstaklega þegar reglurnar í leiknum eru að það eru engar reglur.

 

Möguleikarnir eru endalausir.

Bókanir og frekari upplýsingar fást hjá Guðrúnu Ásu dagskrárstjóra.

Á Úlfljótsvatni hafa skátarnir komið upp glæsilegu tjaldsvæði sem almenningi býðst að nýta sér. Áhersla er lögð á fjölskyldufólk og að bjóða upp á fjölbreytta afþreyingu fyrir yngri kynslóðina. Mikið er um allskonar leiktækjum og aðstaðan sérstaklega góð. Sem dæmi um afþreyingu í boði er bátar, þrautabraut, klifurturn, fótboltavöllur, blakvöllur, folfvöllur, leiktæki og svona mætti lengi telja. Uppbyggingin á svæðinu hefur verið mjög mikil undanfarin ár og öll aðstaða er til fyrirmyndar.

Endilega kíkið á Facebook síðu Úlfljótsvatns og sjáið hvaða dagskrá er í boði um næstu helgi.

Útilífsmiðstöðin er staðsett við Úlfljótsvatn í Grímsnes- og Grafningshreppi, skammt frá Ljósafossvirkjun, u.þ.b. 50 km frá Reykjavík. Frá Reykjavík eru tvær megin akstursleiðir. Annars vegar Nesjavallaleið þar sem ekið er yfir Hengilinn og framhjá Nesjavöllum þangað til að komið er að Úlfljótsvatni. Hins vegar er ekið yfir Hellisheiði að Selfossi þar sem haldið er til norðurs í átt að Þingvöllum þangað til að komið er að Ljósafossvirkjun þá er tekin vinstri beygja í átt að Úlfljótsvatni.

Aðstaðan fyrir tjaldsvæðisgesti er mjög góð. Stórar og góðar flatir við vatnið með rafmagnspóstum. Veiðileyfi er innifalið í gistigjaldi og geta gestir því veitt sér ferskan silung á grillið og á meðan geta krakkarnir leigt hjólabáta eða leikið sér í þeim ótal leiktækjum sem eru á svæðinu. Víðs vegar um svæðið eru grill og bekkir sem gestir geta nýtt sér. Í þjónustumiðstöðinni er hægt nálgast allar helstu upplýsingar og kaupa sér helstu nauðsynjar.

Gestir geta alltaf komið í þjónustuhúsið og notað gestaeldhúsið sem þar er ásamt borðum og stólum. Hreinlætis- og snyrtiaðstaða er öll til fyrirmyndar á svæðinu. Á þjónustusvæðinu er nýlegt 10 sturtu sturtuhús sem er með heitu vatni og opið tjaldgestum. Þá er fjöldinn allur af snyrtihúsum um svæðið með vatnssalernum og utanáliggjandi hreinlætisaðstöðu til að þvo upp mataráhöldin. Það er því leikur einn að halda sér og fjölskyldunni hreinum og snyrtilegum jafnvel þó dvalið sé í tjöldum og börnin verða óhrein í ati dagsins.

Verð fyrir 16 ára og eldri: 1.200 kr.
Frítt fyrir börn undir 16 ára
Rafmagn: 700 kr
Innifalið í gjaldi er aðgangur að heitum sturtum, útigrillum, þjónustuhúsi og veiði í vatninu.

Verðið miðast við að greitt sé í hliði eða þjónustumiðstöð.

Síðan er um að gera að fara á Facebook síðu Úlfljótsvatns og sjá hvað er að gerast þessa stundina á Úlfljótsvatni.

Tjaldsvæðið er opið frá 15. maí til 15. september.